12 ақпан күні аудандық орталық мешіттің бас имамы Құмар Қоныскерей мен найб имамы Исай Қайболда қажы Көбетей, Ахмет ауылдарына барып, мектеп оқушыларымен, жастармен кездесу өткізді. Кездесуге ауыл молдалары, мектеп ұжымы белсене қатысты. Кездесу барысында аудандық мешіттің бас имамы «Отан сүю - иманнан» тақырыбын негізге ала отырып, адамзат өмірінде дұрыс бағытта алынған тәрбиенің көп пайдасын беретінін айта кетті. Ол, әрине, біріншіден – ата-ананың ыстық алақанында өсіп, жетіліп алынған тәрбие.         Екіншіден мектеп қабырғасында ұстаздардың бізге берген құнды да мәнді білімі мен тәрбиесі. Адамға тәрбие ауадай қажет. Тәрбие арқылы біз өз дініміздің тәлімін үйреніп, имандылыққа бет бұрамыз. Тәрбиесіз ұрпақ қашанда еліне көп қасірет әкеледі. Сол себепті ұрпақтың  тәрбиелі болып ер жетуінің іргетасы – ата-ана  мен ұстаздың қолында. Ал берген ілім мен тәрбиені дұрыс қабылдап алу ол, әрине, өз қолымызда екенін тілге тиек етті. Тәуелсіз еліміздің дамуының бірден бір ерекшелігі – қоғам өміріндегі діннің нығаюы болып табылады. Баршамызға белгілі, соңғы уақыттарда дінге сенушілер саны көбеймесе азайған емес. Соның ішінде халқымыздың жетпіс пайыздан астамы асыл дініміз исламды ұстанады. Жастардың тәрбие мәселесі қоғам үшін әр уақытта өзекті болып келген. Жас ұрпақты тәрбиелеу міндетін мемлекеттің ұлттық қауіпсіздігін қамтамасыз етудегі маңызды істердің бірі ретінде ұғыну қажет. Халқымыздың мақсаты – ынтымақ пен бірлік және бейбіт өмір кешу.

Мақпал Жұматаева