Жыл сайынғы игі дәстүрге айналған діни сауат ашу курсының балаларға арналған маусымы тағы да өз дәрежесінде басталды. «Көңілді жаз - 2015» тақырыбымен ұйымдастырылған діни сауат ашу барысында Құран Кәрім әріптері, дұғаларды жатқа айту, қазақша бата мен тілек тілеу, имандылық иірімдері турасында дәрістер жүргізіледі. Жазғы уақытын тиімді пайдалану үшін №1-мешітіне келген балалар саны жетпіске жуықтады. Осы болашақ үшін маңызы зор шараны ұйымдастырған бас имам Орманбет Болатұлы балалардың ортасында болып, бала түсінігіне сай имандылық туралы әңгімелеп берді. Үлгілі болу үшін тәртіпті, тәртіпті болуы үшін иманды болу қажеттігін түсіндірді. Шағбан айында шат көңілмен басталған шара рамазан айына дейін жалғасады. Осы уақыт аралығында балаларды саябақтарға, зообақтарға қыдыртып, көңіл сергіту мен ұлттық және спорттық ойындар өткізу жоспарланған. Дәрістерді наиб имам Ермахан Оралбай, «Астана» медресесінің шәкірті Ақжігіт Аманов өткізуде.

Қарағанды №1-мешітінің баспасөз қызметі