Баxрейн елінен келген қасиетті Құран кітапқа Қарағанды облысының ауылды аймақтары да қол жеткізді. Облысқа қарасты Бұқар жырау ауданының бас имамы Аманбол Рымқұлұлы маңайындағы ауыл имамдарын жиып, Құран Кәрімді табыс етті. Сонымен қатар ауылдың зиялылары, сыйлы ақсақалдарына да қасиетті кітап тарту етілді. Естеріңізге сала кетейік алдыңғы аптада Бас мүфти Ержан қажы Малғажыұлының бастамасымен Құран Кәрім Қазақстанның 14 облысына жеткізілген болатын. Қасиетті Құран кітап Қарағанды өңіріне де жетіп, ҚМДБ-ның Қарағанды өңірі бойынша өкіл имамы Ө.Қ.Бекқожа БАҚ-өкілдерінің қатысуымен салтанатты түрде қала, аудан имамдарын жинап кітапты үлестірді. Ендігі кезек аудан имамдарына келді. Аудан имамы мұндай сыйлықтың орны бөлек деп, ауыл имамдарының басын қосып, Құран кітапты сыйлаған ел жайында айта кетіп, ауыл имамдарына табыстады. Имамдар жомарттық жасаған Баxрейн еліне, Хазретке алғыстарын айтып, ауыл ақсақалдары баталарын берді. Аудан имамы А. Рымқұлұлы “ Құран – Алланың сөзі. Осындай құрметті сыйлыққа ие болып отырғанымызға қуаныштымыз”,-деп ағынан жарылды.

Бұқар жырау аудандық мешітінің баспасөз қызметі