3 желтоқсан – Халықаралық мүгедектер күніне орай Қарағанды қалалық «Әл-Ғаффар» мешітінің ұжымы ерекше жандарға қолдау көрсету мақсатында қайырымдылық іс-шарасын өткізді.

Шара барысында мешіт қызметкерлері мен ерікті жамағат Қарағанды қаласындағы арнайы мүгедектер үйіне барып, ондағы жандарға қамқорлық танытып, тұрмысқа қажетті көмек түрлерін көрсетті.

Мүгедектер үйінің тұрғындарына азық-түлік пакеттері, гигиеналық заттар және күнделікті қажетті тұрмыстық бұйымдар үлестірілді. Жылы жүзді кездесу барысында дін қызметкерлері әлеуметтік қолдауға мұқтаж жандардың жағдайымен танысып, рухани қолдау көрсетті.

Мешіт ұжымы бұл қайырымдылық шарасының басты мақсаты – көпшілік назарын мүгедектігі бар жандардың мәселелеріне аудару, оларға қоғамның толыққанды мүшесі ретінде көңіл бөліп, қамқорлық таныту екенін атап өтті.

Игілікке бағытталған мұндай шаралар алдағы уақытта да жалғасын табады.