Адам қандай да бір затты сатып алса оның жанында қолданылу жөнінде нұсқаулығы қоса жүреді. Егер нұсқаулықты жақсылап оқып, затты пайдалану әдістерін дұрыс үйренсе, сатып алынған зат біздің игілігімізге ұзақ уақыт бойы жарары анық. Сол секілді адамзаттың жаратылуындағы, өмірге келгендегі себебі, оның атқаратын қызметі мен міндеттері, өмірдегі кездесетін әр қиындықтың шешімі, әр сұрақтың жауабы бар ұлы нұсқаулығы бар. Ол – қасиетті Құран Кәрім. Құран Кәрім – бізге ұлы Жаратушымыз Алла Тағаладан түсірілген мейірім мен раһымның көрінісі. Оқыған адамның жанын тазартып, қияметте шапағатшы болып келетін Құран – Алланың кәләмі. «Расында, сендерге Алла тарапынан  нұр және ашық кітап келді. Сол арқылы Алла тағала Өзінің разылығына ілескендерді амандық жолдарына салады және Өз нұсқауымен оларды қараңғылықтан нұрға шығарады әрі тура жолға салады»(1). Аятта айтылғандай Құранның тағы бір қасиеті – Адамның көкірек көзін ашып, тура жолды оған көрсетіп қояды.

          Айлардың сұлтаны – рамазан айы болса, түндердің сұлтаны – Қадір түні болып саналады. Өйткені ол айда және сол түнде қараңғылық басқан жарық сәуле болып  ғаламға қасиетті Құран Кәрім нұры түсірілген. Бұл Құранның кереметінің бір бөлшегі ғана. Жазушысы ұлық болған Кітаптың әр сүресі, әр аяты, әр әрібі қастерлі. Сондықтан да Құран оқудың сауабы оқыған әр әрібі үшін арта бермек. Осындай Құран Кәрім түскен соңғы пайғамбардың үмметі болу бақыты бізге бұйырды.  «Егер Алланың сендерге берген нығметтерін санасаңдар, санап тауыса алмайсыңдар»(2) Осындай ғажапты ой елегінен өткізгенде сансыз нығметтер берген Аллаға мың шүкіршілік айтамыз.

          Күйбең тіршіліктің мәселелері шешілместей көрініп, кейде жанымыз жабырқаған сәтте Құран аяттарын оқу арқылы жанымызға тыныштық ұялатып, бір сәт Құран нұрынан нәр алғандай боламыз. Бұл да Құранның ұлықтығының дәлелі іспеттес. Бұл туралы Алланың кітабында былай делінеді: «Біліп қойыңдар! Жүректер тек қана Алланы еске алу арқылы жай табады»(3).

         «Ей, адамдар! Тәңірлеріңнен сендерге насихат, жүректеріңдегі дерттеріңе дауа, мұсылмандарға тура жол және жарылқау ретінде Құран келді» (4) – деген аяттар адамзаттан сүйінші сұрап тұрғандай. «Біз Құраннан имандылар үшін шипа және мейірім түсіреміз»(5). Өмірімізге пайдасы шаш етектен, ал сауабы ұшан теңіз болған қасиетті кітапты оқымау неткен өкініш?!

           «Ал, кім Менің Еске салуымнан (Құраннан) теріс бұрылса, оған тар өмір болады әрі Қайта тірілу күні оны соқыр күйде тірілтеміз. Ол: «Раббым! Мені не үшін соқыр күйде тірілттің?! Мен көретін едім ғой» дейді. Алла айтты: «Міне осылай. Саған аяттарымыз келген еді, бірақ, сен оларды ұмыттың. Сол секілді бүгін сен де ұмытыласың(6)» дейді.  Қияметтегі мұндай жаман халден баршамызды Алла сақтасын.  Кітапшаға жасырылған үйіміздегі қазынамыздың пайдасын, ақыреттегі сауабын еселеп алуды Алла Тағалам баршамызға нәсіп етсін. Үй ішімізді, жүрегімізді Құран нұрымен нұрландырып, көңілімізге әр аятты жаттанды етіп мәнді өмір сүруімізді нәсіп еткей!

Пайдаланылған әдебиеттер: (1) Құран кәрім «Маида» сүресі, 15-16-аяттар;

(2)«Нақыл» сүресі, 18-аят;

(3)«Рағд» сүресі, 28-аят

(4) «Юнус» сүресі, 57-аят.

(5) «Исра» сүресі, 82-аят.

(6) «Таһа» сүресі, 124-аят.

Қаражал қалалық мешітінің бас имамы Советов Талғат