Ата-бабамыздан жалғасып келе жатқан діни жоралғы мен салт-дәстүрлер сол замандағы аузы дуалы, сөзі өтімді ел ақсақалдарының ысырапшылдыққа жол бермегенін, тәрбие мен адалдық мақсатта қалыптасқанын нақты мысалмен түсіндіре білген. Соның нәтижесінде халқымыз қаза болған адамды жерлеу турасында ғасырлар бойы қалыптастырып, тұрмыста бекем орын алған қағида-ережелері шариғат заңдарымен тығыз байланыста болды. Кешегі кеңестік дәуірде біршама салт, жоралғы, дәстүр үзіліп қалғандықтан, көптеген жайттар өз арнасынан шығып қалған болатын. Ал, қазіргі кезде жерлеу рәсімдерінде ұлттық дәстүр ерекшеліктері сақталғанымен, ысырапшылдық пен бәсекелестікке түсіп жатқандар баршылық. Осы орайда,  Қазақстан мұсылмандары діни басқармасының Төрағасы, Бас мүфти хазіреттің бастамасымен құрылған «Қамқор-Шарапат» салттық қызмет көрсету орталығының қызметі бүгінгі талап пен талғамға сай қолға алынған. «Бір қуаныш, бір қайғы. Алма-кезек зулайды» дегендей, ағайын туыстар қаза мен қуанышта ұжымдасып жататыны белгілі. Муфтияттың бұл бастамасын қолдап қана қоймай, оны іс жүзіне асыру және қазалы ортада өз жақындарымызға түсіндіре отырып талап етуіміз керек деп есептеймін. Себебі, жерлеу рәсімі - қайтыс болған кісіні жер қойнына беру ғана емес, шариғатымыздағы ережелерді сақтай отырып, ысырапшылдықтан тыйылу. Мысалы, қабірге белгі ретінде күмбез тұрғызу міндетті емес. Одан гөрі марқұмға бағыштап жиі құран оқып тұрған сауап. «Qamqor-Sharapat» салттық қызмет көрсету орталығының осы мәселеде нақты пәтуә беруі, дұрыс жол көрсетуі дәл уақытында қолға алынған іс. Ендігі біздің міндетіміз осындай межелі пәтуәні моральдық жақтан қолдап, дұрыс түсіндіру. Әсіресе осы орталықтың жерлеу рәсімдерінде ысырапшылдық пен бәсекелестікке жол бермеу және жалпыға ортақ мәдениет қалыптастыру мақсатында қолға алынған жоба екендігін және қабір басындағы бәсеке ретінде мазар салып жарысуды тоқтатып, ысырапқа жол бермеу үшін зиратты бірізділікке келтіру, жерлеу рәсімдері шариғат нормаларына және ата-баба дәстүріне сай болуымен бірге, өркениет көшінен де артта қалмауы нағыз қажеттілік. Егер де зираттарымыз өз дәрежесінде қамқорлыққа алынып, діни сауаттанған қызметкерлер шұғылданатын болса, халық арасында да бірізділік қалыптасып, зираттар маңындағы қаңқу сөздерге тоқтау болмақ деген ойдамын. Зиратқа қатысты мәселемен барушыларға және зиярат етушілерге шариғат шеңберінен шықпайтындай зиярат әдептерін үйретіп, қызмет ететін, шариғи білімі бар маман болғаны және жерлеу рәсімдерін толыққанды шариғат талаптарына сай дұрыс өткізу сауапты амал.

Сқақов Бейсенбай қажы

дербес зейнеткер