Қазақстан мұсылмандары діни басқармасының төрағасы, Бас мүфти Наурызбай қажы Тағанұлының тапсырмасы аясында Қарағанды облыстық «Әнет баба» мешітінде «Қамқор-Шарапат» салттық қызмет көрсету орталығының рәсімдерін және насихат жұмыстарын жетілдіру семинары өтті.

Жиынға қала имамдары мен басқа да дін қызметкерлері қатысып, бөлім жұмысын кеңірек жолға қоюдың жоспарларын талқылады. «Qamqor-Sharapat» салттық қызмет көрсету орталығының Қарағанды облысы бойынша жауапты маманы Бақдәулет Қыдырбайұлы жерлеу рәсімдерін бірізділікке түсіру мен діни рәсімдердегі дәстүр сабақтастығы жайында кеңінен тоқталды.

Ал, «Шариғат және пәтуа» бөлімінің облыстағы жауапты маманы Юсупбек Шұғайұлы жерлеу мен зират мәдениетіне қатысты бірқатар пәтуалардың мән-жайын түсіндіріп өтті.

Сондай-ақ Саран қалалық мешітінің имамы Нұржігіт Оразалыұлы мәйіт сақтау, жылжымалы тоңазытқыштар және марқұмды соңғы сапарға шығарып салу үшін қажетті дүниелерге қатысты өзінің тәжірибесімен бөлісті.

Жиын соңында «Qamqor-Sharapat» бөлімінің жұмысын насихаттауға бағытталған арнайы бүктемелер таратылды.