Шет ауданы, Ақадыр кенті «Иса молда» мешітінің имамы Азамат Кешубаев өңірдің қазыналы қарттарын мейраммен құттықтады.  Қарттар күніне орай 80-90 жасқа келген ақ жаулықты әжелер мен ақсақалдардың үйіне арнайы барып, тәттілер сыйлады.

Халқымызда «Қартын сыйлаған елдің қазынасы мол» деген ұлағатты сөз бар.

Құранның «Исра» сүресінің 23-24 аяттарында Алла Тағала: «Раббың Өзінен басқаға құлшылық етпеулеріңді және ата-анаға ізгілік жасауларыңды бұйырды. Егер олардың біреуі не екеуі де қартайса, екеуіне «түһ» деп те айтпа. Оларға дауыс көтерме, тек жақсы сөз сөйле. Оларға мейірімділік пен кішіпейілділіктің қанатын жайып: «Раббым! Кішкентайымда мені тәрбиелегені секілді оларға Сен де рахым ет» деп айт», – деген.

Мешіт имамдары жыл сайын мереке күндері қарттарды қуантуды дәстүрге айналдырған.