Дініміз ислам тазалыққа өте қатты көңіл бөліп, оның маңыздылығын жан-жақты түсіндіреді. Ерікті, еріксіз құлшылықтардың барлығы тазалықтан басталады. Күнделікті тұтынатын тағамы мен киімі, бой-басы, төсек-орны, жұмыс орны, жүрген айналасы т.б. қажеттіліктері таза болмаса, адам жаны мазасызданады. Ал исламдағы парыз амалдарды тазалықсыз атқару мүлде мүмкін емес. Қасиетті Құран «Бақара» сүресінің 222-аятында: «Сөзсіз Алла тәубе еткендер мен тазалағандарды жақсы көреді», – деп, тазалықты мадақтайды.Құран мақтаған нәрсе, қай заманда да пайдалы, адамның екі дүниесіне өлшеусіз, өміршең сауап әкеледі деген сөз. «Тазалық – иманның жартысы» - демекші, әр мұсылманға түскен мiндет – айналамыздағы қоршаған ор­та­ны таза ұстау, ағаш отырғызып, табиғатты аялау. Себебі мұсылман бүлдiрушi емес, бүтiндеушi, қирату­шы емес дұрыстаушы, зиян келтiрушi емес, пайда әкелушi. ҚМДБ-ның Қарағанды өңірі бойынша өкіл имамы Бекқожа Өмірзақ қажы Қазкенұлының тікелей тапсырмасымен, облыс мешіттерінде сәуір айынан бастап сенбілік шаралары жүргізілуде. Кезекті сенбілік бүгін, яғни сәуір айының 19-жұлдызында, қалалық 1-мешітте ұйымдастырылды. Сенбілікке облыстық орталық мешіттің имамдары мен №1 қалалық мешіттің ұжымы, бір үйдің балаларындай атсалысып, мешіт ауласын, медресе айналасын тап-тұйнақтай етіп жинастырды. Сенбілік өткізу жайлы әңгімені қазіргі қоғамда жаппай сөз етіп және оны әр қырынан көрсетіп отырса, ұсақ-түйек сияқты көрінетін нәрседен үлкен істердің бастау алатынын аңғарар едік. Көреген Ахмет Байтұрсынұлы айтқандай: «Бұл сөзді біреу алмас, біреу алар, Құлағын біреу салмас, біреу салар. Теп-тегіс көпке ұнау оңай емес, Кейіне жарамаса, кейіне жарар».