Адамзаттың ардақтысы Пайғамбарымыз Мұхаммедтен (с.ғ.с.) жеткен хадисте: «Шағбан айының ортаңғы түні болғанда оны құлшылықпен, ал күндізді оразамен өткізіңдер. Себебі, күн батқанда Хақ Тағала дүние аспанына түсіп, таңатқанға дейін былай дейді: «Менен кешірім тілеуші бар ма екен? Оны кешірейін. Менен ризық-несібе тілеуші бар ма екен? Оған ризығын берейін. Дертіне шипа тілеуші бар ма екен? Дертіне шипа берейін. Кім не қаласа, оған соны берейін» (имам Ибн Мажәһ) делінеді. Пайғамбарымыз (с.ғ.с) айтты: «Кімде-кім Бараат кешінде 100 рәкағат намаз оқыса, Алла Тағала ол кісіге 100 періште түсірер,оның 30-ы жанати періште, 30-ы тозақ отынан қорғар періште, 30-ы дүние апатынан сақтайтын періште, 10-ы шайтанның азғыруынан сақтайтын періште»—деді. Бұл түнде құран оқып, қаза болған намаздарды өтеп, нәпіл намаз оқылса, тілек айтылып, ғибадат етілсе, Алла Тағала мейіріміне, рахымына бөлеп тілектерді қабыл етеді. Осы түнде ҚМДБ-ның Қарағанды өңірі бойынша өкілі Бекқожа Өмірзақ қажы Қазкенұлының тапсырмасына сәйкес, Қарағанды облыстық орталық мешітінің ұжымы жиналған барша мұсылман бауырларға арнап, дастархан жайып, ауызашар берді. Ақ дастархан барысында шағбан айы, осы айдағы бараат түні жайында ғибратты әңгіме, ауызбіршілік пен ынтымақ турасында көркем уағыз айтты. Момын мұсылмандардың игі амалдары Алла Тағаланің мейіріміне бөленетін бұл түнде Қарағанды облыстық орталық мешітінің ұжымы мен жиналған жамағат салиқалы әңгімелер айтып, көкейдегі сұрақтарымен бөлісті. Ас соңында Алла Тағаладан елімізге тыныштық,жұртымызға амандық тілеп дұға жасалынды.

Тотия Енсебаева Қарағанды облыстық орталық мешітінің баспасөз қызметі