Айлардың сұлтаны болған, нұр төгілген, мерекелі де берекелі, қасиетті Рамазан айының да басталуына санаулы күндер қалды. Мұсылман жамағаты айлардың төресін қимастықпен шығарып салып, сағынышпен тағатсыздана тосары сөзсіз. Әр мұсылман осы қадірлі айды өздігінше күтіп, қарсы алуға дайындалады. Бірі рухани қамданса, өзгесі туған-туыс, көрші маңайына насихат айтып, құттықтаулар жолдап жатады. Ал, осы берекесі мен мерекесі мол айға, Қарағанды облысына қарасты Ақтоғай ауданы жамағатының сағынышы мен қамданысы ерекеше. Рамазан айының құрметіне, арнайы ұйымдасытырылған «Қош келдің Рамазан» атты арқа ақындарының айтысы ардақты айдың маңызын ашып, халықтың оразаға деген ниеті мен ыстық ықыласын оята түсті. Айтулы шара аудандық мешіт дайындаған «Ораза мұсылманның-парызы» атты бейнероликпен бастау алып, медресе шәкірті оқыған Құран аяттарымен жалғасын тапты. Сонымен қатар Қарағанды қалалық мешітінің найб имамы Ермахан Оралбай қажының Ораза айы жайлы айтқан уағыз-насихаты, халық көңілінен шықты. Аталмыш айтыста елімізге танымал Айтбай Жұмағұл мен Дидар Қамиев, Тілеген Әділов пен Еркебұлан Мүбәрәк және Қайрат Иманбек пен Ботакөз Мұхиден сынды арқаның арынды ақындары өнер көрсетті. Айтыскерлеріміз Рамазан айының қадір қасиеті, оразаның пайдасы, ата-бабамыз берік ұстанған, Ұлы Жаратушы нығмет етіп берген, асқақ діні ислам жайында кеңінен жыр тербетіп халыққа рухани азық бере білді. Ақындарымыздың мақсаты-үлде мен бүлде емес, асыл дінімізді насихат қылып, халыққа оразаның артықшылығын жеткізгенге берілетін Алла алдындағы жүлде еді. Ақтоғайлық Еркебұлан Мүбәрәктің өнеге толы жыры көңілді тербесе, арқаның ақиық ақыны Дидар Қамидың орындаған «Ана» туралы термесі халықтың жүрегіне мейірім, жанарына жас ұялатты. Айтыс соңында Ақтоғай аудандық мешітінің бас имамы Ғалым Жәкеш айтыскерлерімізге алғыс жариялап, дүйім жұртты келе жатқан Рамазан айымен құттықтап, ораза ұстауға шақырды. Жалпы өткізіліп отырған шараның идеясы, мақсаты, халыққа насихат жасау, оразаның маңызын түсіндіру, діни мерекелерімізді көпшілік болып тойлап, ел арасында асқақтату екендігін тілге тиек етті. Сондай-ақ биыл «Дін мен дәстүр» жылы деп жариялануына орай, айтыстың да бастау алуы, дінбасымыздың жолдауына қолдау болмақ . Себебі, айтыс - әдебиет жанры болғанымен, ертеден қалыптасқан халықтық дәстүрдің үлкен түрі екендігін, қазақ халқының жаны өлең-жырмен айтылған өсиетті, уағызды, жеңіл де жылдам қабылдайтындығын айтты. Түрлі мерекелерде бой көтеретін айтыс, ақындар мүшәйрасы, қазақ күресі сынды ұлттық құндылықтарымызды насихаттаушышараларды,мұсылмандық мейрамдарымызда да ұйымдастырып тұрсақ жақсы болмақ. Келе жатқан қадір қасиеті мол айда жасаған құлшылық, тілеген тілек, істеген игі істеріміз қабыл болып, Алла тағаланың рахметімен, разылығына бөленейік.