Шахтинск қалалық «Нұр» мешітінің жанынан құрылған «Аталар мектебі» ақ дастархан басында бас қосып, рухани-тағылымдық жиын өткізді. Кездесу «Отбасылық тәрбие және адал қоғам» тақырыбына арналды. Жиында мешіт имамы Әбілхайыр Кәсенұлы мазмұнды баяндама жасап, отбасы институтының қоғамдағы орны, ұрпақ тәрбиесіндегі ата-әженің рөлі, ұлттық құндылықтар мен діни тәрбиенің сабақтастығы жөнінде терең ой қозғады.

Имам өз сөзінде адал қоғамның негізі – адал отбасы, ал адал отбасының тірегі – дұрыс тәрбие екенін атап өтті. Ислам дініндегі отбасылық құндылықтар, үлкенге құрмет, кішіге ізет, жауапкершілік пен аманат ұғымдарының маңызы кеңінен түсіндірілді. Сонымен қатар, бүгінгі қоғамдағы рухани дағдарыстардың алдын алуда ақсақалдар институтының, «Аталар мектебінің» орны айрықша екені ерекше атап өтілді.

Кездесу соңында алдағы уақытта да осындай мазмұнды рухани кездесулерді тұрақты түрде өткізу туралы ортақ келісім жасалып, «Аталар мектебі» жұмысының қоғам үшін маңыздылығы тағы бір мәрте айқындала түсті.