Шахтинск қалалық «Нұр» мешітінде игі рухани шара ұйымдастырылды. Мешіт имамы Әбілхайыр Кәсенұлының ұйытқы болуымен Ислам дінін қабылдаған өзге ұлт өкілдеріне арнайы ауызашар дастарханы жайылды.

Аталған шараға 30-ға жуық адам қатысып, олардың қатарында орыс, неміс, славян және өзге де ұлт өкілдері болды. Бұл – Ислам дінінің ұлт пен ұлысқа бөлмей, барша адамзатқа ортақ құндылықтарды насихаттайтындығының айқын көрінісі.

Кеш барысында мешіт имамы Әбілхайыр Кәсенұлы және азаншы Нұрғали Берікқұлұлы жиналған жамағатқа уағыз-насихат айтып, имандылық, бірлік пен бауырмалдықтың маңыздылығына тоқталды. Сондай-ақ, жаңадан Исламды қабылдаған жандарға рухани қолдау көрсетіліп, олардың жүректеріне сенім мен үміт ұялататын тағылымды әңгімелер айтылды.

Іс-шара соңында барлық қонақтарға мешіт атынан естелік сыйлықтар табысталып, жылы лебіздер білдірілді. Мұндай басқосулар қоғамдағы татулық пен өзара құрметті арттырып, рухани байланысты нығайта түсетіні сөзсіз.