Қарағанды облысы Шахтинск қалалық «Нұр» мешітінің имамы Мәулен Әбілхайыр Кәсенұлы «Көшпелі уағыз керуені» жобасы аясында Шахан кентіне барып, жұма намазында уағыз-насихат жүргізді.

Жұма уағызында имам «Дүние — ақырет егістігі» тақырыбында сөз қозғап, мұсылман баласының бұл дүниедегі әрбір іс-амалының ақыретте жауапкершілікке алынып, сауап не күнә ретінде жазылатынын түсіндірді. Сонымен қатар жамағатты адалдыққа, ізгі амалдар жасауға және уақытты пайдалы өткізуге шақырды.

Игі іс-шараның мақсаты – ел арасында діни сауаттылықты арттыру, имандылық пен рухани құндылықтарды насихаттау.

Алла Тағала осындай игі істердің қабыл болуын нәсіп етсін!

ҚМДБ Қарағанды облысы өкілдігінің баспасөз қызметі