Қасиетті Құрбан айт мерекесіне орай Абай аудандық мешіті жанынан арнайы құрбандық шалатын орын дайындалды. Бұл жұмыстар тұрғындардың діни рәсімді талапқа сай әрі ыңғайлы жағдайда орындауына мүмкіндік жасау мақсатында ұйымдастырылып отыр.

Мешіт аумағында құрбан шалуға арналған арнайы орындар белгіленіп, тазалық пен қауіпсіздік талаптарына ерекше көңіл бөлінді. Сонымен қатар келушілерге қолайлы жағдай жасау үшін қажетті құрал-жабдықтар әзірленіп, аумақ толықтай ретке келтірілді.

Мешіт қызметкерлерінің айтуынша, құрбандық шалу барысында санитарлық тазалық пен тәртіп қатаң сақталады. Сондай-ақ тұрғындарға діни рәсімді сабырмен, ұйымшылдықпен өткізу жөнінде түсіндіру жұмыстары жүргізілуде.

Аудан тұрғындары мұндай дайындық жұмыстарына ризашылықтарын білдіріп, қасиетті мерекені жоғары деңгейде өткізуге атсалысып жатқан мешіт ұжымына алғыстарын жеткізді.

Құрбан айт — мейірім мен жанашырлықтың, бірлік пен бауырмалдықтың мерекесі. Осыған орай ұйымдастырылған игі шаралар қоғамдағы ынтымақ пен рухани құндылықтарды нығайта түсері анық.