4-маусым – Мемлекеттік рәміздер күніне орай Қарағанды облыстық «Әнет баба» мешітінде “Имани жаз-2026” жазғы діни сауат ашу курсында діни білім алып жатқан жас жеткіншектерге арналған ұлттық құндылықтарды насихаттайтын тәрбие- танымдық шара ұйымдастырылды.

Шара барысында алдымен «Дін мен дәстүр» бағыты аясында балаларға қазақ халқының ұлттық ойыны – асық ату таныстырылып, оның ережелері түсіндірілді. Сондай-ақ шәкірттер ұлттық мұрамызды дәріптейтін ойынға белсене қатысып, ойнау тәсілдерін меңгерді.

Сонымен қатар, ҚМДБ жанындағы «Зекет және қайырымдылық» қорының қолдауымен балаларға тәттілер үлестіріліп, Мемлекеттік рәміздер күніне орай Қазақстан Республикасының Туы таратылды.

Шара барысында жас буынға Мемлекеттік Ту, Елтаңба және Әнұранның маңызы түсіндіріліп, рәміздерді құрметтеу – әр азаматтың қасиетті борышы екені айтылды. Балаларға отансүйгіштік рух пен ұлттық құндылықтарды дәріптеудің маңызы кеңінен насихатталды.