Қарағанды қалалық “Әл-Ғаффар” мешітінде Ұлттық дәстүр мен шариғат үндескен тағылымды кездесу өтті.

Қазақ халқының сан ғасырлық салт-дәстүрі мен Ислам дінінің асыл құндылықтары бір-бірімен сабақтасып, ұрпақ тәрбиесі мен қоғамның рухани дамуына қызмет етіп келеді. Ұлттық болмыс пен діни танымның үйлесімі халқымыздың өмір салтынан, әдет-ғұрпынан және отбасы құндылықтарына деген құрметінен айқын көрініс табады.

Осы мақсатта Әл-Ғаффар мешітінде ұлттық дәстүр мен шариғат үндескен тағылымды кездесу ұйымдастырылды. Кездесу барысында қатысушыларға отбасы берекесі, үлкенге құрмет, кішіге ізет, ата-ананы ардақтау, ұлттық құндылықтарды сақтау және діни тәрбие мәселелері жөнінде насихат айтылды.

Шара ұлттық нақышта безендірілген ортада өтіп, ата-бабадан қалған өнегелі дәстүрлердің мән-маңызы кеңінен сөз болды. Қатысушылар халқымыздың рухани мұрасы мен Исламның көркем құндылықтарының өзара үйлесім табуы қоғамның тұтастығы мен ұрпақ тәрбиесіндегі маңыздылығын атап өтті.

Кездесу соңында жиналған қауымға ізгі тілектер айтылып, елдің амандығы, отбасының берекесі мен ұрпақтың тәрбиесі үшін дұға жасалды.

Мұндай игі шаралар ұлттық құндылықтарды дәріптеп қана қоймай, дәстүр мен діннің сабақтастығын насихаттауға, жастардың рухани тәрбиесін нығайтуға өз үлесін қоса береді.