Қарағанды облысы, Саран қаласы. Саран қалалық мешітінде жастар мен жамағаттың діни білімін арттыру мақсатында «Мұсылманның 40 парызы» атты танымдық сайыс ұйымдастырылды. Іс-шараға мешіт шәкірттері, жасөспірімдер мен қала тұрғындары қатысып, өз білімдерін сынады.

Сайыстың негізгі мақсаты – ислам дінінің негізгі қағидаларын насихаттау, мұсылманның парыздарын үйрету және жастардың рухани тәрбиесіне оң ықпал ету. Қатысушыларға иман шарттары, ислам шарттары, дәрет пен намазға қатысты парыздар, сондай-ақ күнделікті өмірде орындалуы тиіс діни міндеттер бойынша сұрақтар қойылды.

Сайыс бірнеше кезеңнен тұрды. Алғашқы бөлімде қатысушылар теориялық сұрақтарға жауап берсе, келесі кезеңдерде жатқа айту, жылдам сұрақ-жауап және жағдаяттық тапсырмалар орындалды. Қатысушылар өздерінің діни сауаттылықтарын көрсетіп, белсенділік танытты.