«Дархан дала» жобасы аясында Қарқаралы аудандық «Құнанбай қажы» мешітінің шәкірттері табиғат аясында бас қосып, рухани-танымдық әрі тәрбиелік шараға қатысты.

Игі шараны мешіт ұстазы Айбар Жанатбекұлы ұйымдастырды. Кездесу барысында жастарға салауатты өмір салтын ұстанудың маңызы, бауырмалдық пен бірлікті сақтау, өзара сыйластық, жауапкершілік және ұлттық-рухани құндылықтарды дәріптеу жөнінде тағылымды насихат айтылды.

Сонымен қатар, табиғат аясында түрлі танымдық және спорттық ойындар ұйымдастырылып, шәкірттердің ұйымшылдығы мен достық қарым-қатынасын нығайтуға ерекше көңіл бөлінді. Мұндай басқосулар жастардың бос уақытын тиімді өткізуіне, денсаулығын нығайтуына және рухани тәрбиесінің қалыптасуына оң әсер етеді.