Қарағанды қалалық «Төлеутай ата» мешітінде Мәуліт айының басталуына орай мешіт жамағаты арасында Пайғамбарымыз Мұхаммед ﷺ-нің өмір жолына қатысты сұрақ-жауап кеші ұйымдастырылды.

Рухани шараны мешіттің наиб имамы Дархан Түменбай жүргізді. Кездесу барысында жамағатқа Пайғамбарымыздың ﷺ өмірбаяны, өнегелі ғұмыры, көркем мінезі мен сүннетіне қатысты түрлі сұрақтар қойылып, қатысушылар өз білімдерін ортаға салды.

Сұрақ-жауап барысында жамағат белсенділік танытып, қойылған сұрақтарға жауап беруге атсалысты. Сонымен қатар қатысушылар Пайғамбарымыздың ﷺ өміріне қатысты өздерін қызықтырған сауалдарын қойып, жауап алды.

Шара соңында Пайғамбарымыз Мұхаммед ﷺ-нің өмірбаянына арналған кітаптар жамағатқа сыйға тартылды.

Тағылымды кездесу жамағаттың діни білімін арттырып, Алла Елшісінің ﷺ өнегелі өмірін тереңірек танып-білуіне мүмкіндік берді.