Қарағанды қалалық «Төлеутай ата» мешітінің ұстазы Фатима Аманболдықызының ұйымдастыруымен Алла Тағаланың көркем есімдерінің бірі – «Әл-Мәлик» есімінің мағынасы мен мәні кеңінен түсіндірілді.

Уағыз барысында «Әл-Мәлик» – бүкіл жаратылыстың шынайы Иесі, барлық билік пен құдіреттің жалғыз иесі екені айтылды. Сондай-ақ адам баласының Алланың ұлықтығын танып, Оған тәуекел етуі, шүкіршілік жасап, әрбір ісінде жауапкершілік танытуы жөнінде тағылымды насихат айтылды.

Фатима Аманболдықызы жамағатқа Алланың көркем есімдерін танып-білудің жүрек тәрбиесі мен иманды нығайтудағы маңызына тоқталып, мұсылман адамның күнделікті өмірінде осы есімдердің мәнін түсініп, ғибрат алуы қажеттігін жеткізді.

Кездесу соңында жамағат көкейдегі сауалдарына жауап алып, рухани білімдерін толықтырды.