Қарағанды облысы бойынша әйел-қыздар секторының жетекшісі Әйгерім Берікболқызы іссапармен Түркістан қаласына барып, отбасылық құндылықтарды нығайтуға бағытталған маңызды семинарға қатысты.

Түркістан қаласында өткен «Отбасылық әл-ауқатты нығайту жөніндегі ұлттық диалог: тұрмыстық және гендерлік зорлық-зомбылықтың алдын алу және ведомствоаралық ден қою жүйесіндегі діни және қоғам өкілдерінің рөлі» атты семинарда отбасы институтын нығайту, тұрмыстық және гендерлік зорлық-зомбылықтың алдын алу, сондай-ақ осы бағыттағы діни және қоғам өкілдерінің жауапкершілігі кеңінен талқыланды.

Іс-шара барысында отбасындағы өзара сыйластық пен жауапкершілікті арттыру, әйелдер мен балалардың құқықтарын қорғау, қоғамда зорлық-зомбылыққа жол бермеу мәдениетін қалыптастыру мәселелері қозғалды.

Семинарға қатысу барысында Әйгерім Берікболқызы тәжірибе алмасып, өзара пікір алмасу алаңында Қарағанды облысында әйел-қыздармен жүргізіліп жатқан рухани-ағартушылық жұмыстардың маңызына тоқталды.

Мұндай басқосулар діни және қоғамдық ұйымдар арасындағы өзара байланысты нығайтып, отбасы құндылықтарын дәріптеу мен қоғамдағы өзекті мәселелердің алдын алуға бағытталған бірлескен жұмыстарды жетілдіруге мүмкіндік береді.