Қарағанды имамы балаларға арналған орталықта насихат жүргізді

Қарағанды қалалық «Ар-Рахман» мешітінің наиб имамы Жарылқап Нұрлыбек Қарағанды облыстық балаларға арналған арнаулы әлеуметтік көмек көрсету орталығының ұжымына түсіндірме-насихат жұмысын жүргізді.

Аталған іс-шара Қазақстан мұсылмандары діни басқармасының «Ислам және отбасы құндылығы» жылы аясында өтіп, «Исламдағы бала тәрбиесі» тақырыбы қамтылды.

Насихат барысында исламдағы бала тәрбиесінің негізгі қағидаттары – мейірім, әділдік, жауапкершілік және рухани құндылықтарды дәріптеу мәселелері кеңінен түсіндірілді. Сондай-ақ Пайғамбарымыз Мұхаммедтің (оған Алланың салауаты мен сәлемі болсын) балаға деген мейірімді қарым-қатынасы мен өнегелі тәлім-тәрбиелік үлгілері айтылды.

Бұл игі бастама балалардың тәрбиесін күшейтуге, қоғамдағы отбасы құндылықтарын насихаттауға және қатысушылардың рухани танымын арттыруға ықпал етті.

Іс-шара соңында мекеме ұжымы имамға алғысын білдіріп, мұндай рухани кездесулердің тәрбиелік маңызы зор екенін атап өтті.

ҚМДБ Қарағанды облысы өкілдігінің баспасөз қызметі